YuxuPis yuxu görəndə
Axar suya danışarlar.
Dərdi atıb insanlar
Belə rahatlaşarlar.
Pis yuxu görmüşəm mən də
Gözümü açandan,
dünyaya baxandan.
Yuxum yerində qalıb
Qırıq kino lenti tək
Nə gedir irəli,
nə də qayıdır geri.

Eyni röya
yordu məni, axar su!
Hər gün yatmış qürurum
O yuxuya baxar,su!
Mən danışım dərdimi,
Axar su, məni dinlə
İcazə ver bir anlıq,
Həmdəm olum səninlə.
O yuxu,
Qarabağ yuxusudur,axar su!
İçimdə bir qorxu var
O qorxu
Qarabağ qorxusudur,axar su!
Yox, qorxmuram
can verməkdən,
qan verməkdən.
Mən qorxuram vətənimi,
torpağımı,
Birdəfəlik itirməkdən.
Odur ki danışım sənə,
Amma dərdimi aparma,su!
Qoy bu dərd yandırsın bizi,
Qoy bu dərd yapışsın bizə,
Onu bizdən qoparma,su!
Yəqin bir gün bu millətin
Səbr kasası dolar.
Belə fikir söyləyiblər :
Türk özünə dönəndə
Böyük olar!
Böyük olar!

Məhəbbət

Məhəbbət—
balla dolu pətək.
Yaxınlaşırsan
dadmaq üçün o baldan.
Elə ki daddın,
yapışıb qalırsan
Qopa bilmirsən ondan.
Bundan sonra başlayır
məhəbbət əzabı
Sancır baş-gözünü arılar,
Sizıldadır,
incidir səni bu ağrılar.
Qurtulub qaçmaq istəyirsən,
Yapışıb qalır əlin,ayağın.
Ölmək istəyirsən,
Bu şirinliyə
əlvida demək istəmir dodağın.
Bağlanır əlin,
bağlanır qolun,
Getmək üçün
yoxdur yolun.
Məhəbbət—
balla dolu pətək.
Yaxınlaşırsan,
dadmaq üçün o baldan.
Elə ki daddın,
Yapışıb qalırsan,
qopa bilmirsən ondan.

Yuxu

Nəhayət tutub əlini
Açıqca “sevirəm” dedim.
Nəhayət baxıb gözünə
“Getmə,səninəm” söylədim.

Dedim sevgi etirafı
Nə gözəl bir duyğu imiş
Fəqət açıb gözlərimi
Gördüm bu bir yuxu imiş.