Əli Əlioğlu“Hər şey yaxşı olacaq”
O, mənə təsəlli verir
Mən isə ona…
Hər şeyin yaxşı olacağından
isə nə mən xəbərdaram,
nə də ki o…
Bilirəm ki, iş tapmalı
və işləməliyəm.
O da bilir ki, iş tapmalı
və işləməliyəm.

İşsizlərin baş alıb getdiyi
bu şəhərdə
Niyəsə hər ikimiz arxayınıq ki,
Hər şey çox gözəl çatacaq sona.
“Hər şey yaxşı olacaq”-
O, mənə təsəlli verir,
Mən isə ona…

Avtobioqrafiya

Zaman öz sürətilə
Dayanmadan gedir…
Atam indi öz məzarına
Atalıq edir…

Anam ən möhkəm daş
Ən zərif çiçəkdir…
Susqun, incik və
Sakit çırpınan ürəkdir…

Qardaşım
Bəzən dünyagörmüş qoca,
Bəzən uşaq olur
Balaca…

Sevgilim ağıllı
Və məni anlayan,
İncidəndə isə ağlayan
bir qızdır…

Mənsə həyatımdan
Razı biriyəm.
Şükür edirəm ki,
Hələ diriyəm…

Ruhumun nazı ilə oynayıram

Gülüşümə razı deyilsənsə,
Taleyimizlə barışaq –
Otur ağlaşaq!

Ağlamağıma razı deyilsənsə,
Ömrümüzü sürək –
Otur gülək…

Yox? Razı deyilsən
Onda həyatı duyaq –
Get həzin mahnı qoy,
Oynayaq…

Bezdin? İndi nə edək?
Əynini qalın geyin –
Həyətdə gəzək…

Üşüdün? Yaxşı, gəl qayıdaq..
Yorulmusan?
Gözünü yum yataq…