“Şəms” şairə qadınlar məclisi “Vahid” poeziya evində, Həkim Qəninin rəhbərliyi ilə, eyni zamanda ustad qəzəlxan Hacı Şahin Verdiyevin iştirakı ilə bu ilin mart ayında yaradılıb. Üzvləri hərəsi bir ixtisas sahibi olan “Şəms” qadındar məclisi “Vahid” ədəbi məclisinin bir qoludur. Məclisi təmsil edən Elnarə Şəms, Xatirə Vaqif, Xalidə Əfəndiyeva, Dilşad Qəmli və Leyla Mövsüm imzalarına görə ədəbi ictimaiyyətdə tanınmış gənc qadın yazarlarımızdandır. “Şəms” məclisinin üzvlərinin əksəriyyəti eyni zamanda Şahin Fazilin rəhbərliyi ilə keçirilən “Məcmə-Üş-Şüəra” məclisinin fəal üzvlərindəndir.

Əruz, heca, sərbəst vəzndə və mənsur şeir formasında yazıb-yaradan bu gənc şairələr artıq ədəbi aləmə vəsiqə alıblar. “Qara tabut” kitabının müəllifi Elnarə Şəms ixtisasca hüquqşünas olsa da, insanlardan daha çox, şeirin, sözün hüquqlarını qorumağı daha vacib sayır: “Normal, savadlı və sağlam gənclərlə ədəbi mülahizələr keçirməyə həmişə hazırıq. Arzumuzdur ki, bu istiqamətdə istedadlı gənclərdən ibarət ədəbi gəncliyin forumunu keçirək. Biz istəyirik ki, Azərbaycanın müxtəlif bölgələrindən müəyyən səbəbdən ədəbi mühitə qatıla bilməyənlər də imkan daxilində bizimlə əlaqələr yaratsın, şeirlərini, hekayələrini “Vahid” poeziya evinə göndərsinlər”. Xatirə Vaqif ixtisasca həkimdir. Onun artıq “Şeir olmaq istəyirəm” və “Sevgimin yaşı” adlı iki kitabı nəşr edilib. Dil və tarix elmlərinin sirlərinə dərindən bələd olan Xatirə xanım şeirimizin dilinin və tarixinin qayğısını çəkmək istəyir, bu kriteriyaları özünə doğma bilir. Dilşad Qəmli isə tibb bacısıdır. Kiçik yaşlarından şeir yazan Dilşad xanım poeziyanı mənəvi müalicə üsulu sayır. Onun fikrincə, yaxşı şeir insanlarda yaranan gərginliyi, mənfi yüklənmələri aradan qaldırırsa, mənən rahatlıq gətirirsə, dava-dərmana ehtiyac duyulmaz. “Ağlasam, gözümdən töküləcəksən” kitabının müəllifi Xalidə Əfəndiyevanın iki övladı var. Buna görə də özünü iki universitet bitirmiş hesab edir. Onun fikrincə, analıq dünyanın bütün peşə və sənətlərindən üstündür. Məclisin fəallarından biri də Leyla Mövsümdür və o, tənqidi fikirlərinə görə fərqlənir. Tibb Universitetini bitirsə də, şeirin sirli-sehrli aləmi Leylanı özünə elə çəkib ki, hərdən həkim olduğunu da unudur. “Şəms” qadın yazarlarının məclisi fəaliyyətə başladığı vaxtdan bir çox tanınmış şair və yazıçılarla maraqlı görüşlər keçirib. Ədəbiyyatımızda tanınmış imza sahiblərindən N.Həsənzadə, Ə.Mahir, Q.Nəcəfzadə, A.Arabaçı, xalq artisti, məşhur xanəndə Ə.Məmmədov, ustad qəzəlxan Ə.Nəzərli və bir çox ünlü simalar “Şəms”in qonağı olublar. Onlar bu ədəbi məclisin fəaliyyətini bəyəndiklərini bildirib, tövsiyələrini veriblər. “Şəms”çilərin yaradıcılığı dövri mətbuatda müntəzəm işıqlandırılır, yaradıcı xanımlar radiodakı müxtəlif ədəbi verilişlərdə fəal iştirak edirlər.

Faiq HÜSEYNBƏYLİ