Leyla MətinSəni sevdiyini söyləyən
saysız adamların içində
dost axtarmaq qədər mənasız,
Qulağını oxşayan,
bəzəkli cümlələrin içində
səmimiyyət tapmaq qədər çətindir yaşamaq.
Zənn edərsən ki, var olduğuna dəlildir,
Və anlarsan ki, dayandırmaq istədiyin,
ən gözəl anlara qənimdir.
Boş şeydir!
Sadəcə və sadəcə ölməyə zəmindir
yaşamaq.

Xoşbəxt insan şəkli

Həyatin kiçik şəklidir dəniz limanı…
Hər kəs səfər halında,
izdiham içində.
Hər kəs ayrı biçimdə:
cılız,
cüssəli,
qayğısız,
qüssəli…
Kimi uçun görüş yeridi bura,
Kimini isə ömürluk itirər kimi…
Gələnə gülə-gülə qucaq açanlar,
Gedənə ağlaya-ağlaya əl sallayanlar…
Ağlaya-ağlaya ürək açib,
Gülə-gülə yola salanlar da var mənim kimi…

Nə qarşılayanam bu gün,
Nə yola salanam.
Bu qədər adamin içində tənha adamam.
Gözümdən bu yana ötə bilməyənlər
yanımdan ötürlər.
Boylanıram sağa-sola,
Öpüşən səvgililərə baxıram gözlərim dola-dola…
Başımı aşağı dikirəm,
Dənizdən qəmli əksimi silirəm,
Nəmli gözlərimin altına bir təbəssüm atıram
imza kimi:
xoşbəxt olmağa dəniz yətməzmi ki?!

Tənha oyunu

Hərdən yatmazdan qabaq
Tanıyıb-tanımadığım bütün nömrələrə
Mesaj atmaq keçir könlümdən…
…gülmə…!
Səhər mənə gələn saysız mesajları görüb
sevinim deyə.
Sən bunun nə olduğunu nə biləsən?
Bu – tənhaların ən böyük sevinci,
ən sevimli oyunu…
…ağlama…nə olar?!