Dilşad İsaqovaBaxışın kiminsə gözündə qalıb,
Mənim gözlərimə ilişmir daha.
Ürəyin boş idi,hardasa dolub,
Mənim ürəyimlə danışmır daha.

Özünü hardasa qoyub gəlmisən,
Mənim işlərimə qarışmır daha.
Gözünü kimdəsə qoyub gəlmisən,
Baxışım gözünlə barışmır daha.

Belə baxışlara öyrətmə məni,
Baxışım qayıdar gözümə batar.
Nə olar həsrətə öyrətmə məni,
Baxışım gözümdən özünü tapar.

Mənim həsrətimin seli var,gülüm,
Çağlayar gözümdən,üzümə yağar.
Mənim ürəyimin əli var gülüm,
Sevməsə,qayıdar özünü boğar.

Dərdim özümdən yekədir

O qədər ki,böyütmüşəm,
Dərdim özümdən yekədir.
O qədər ki,üyütmüşəm,
Sevincim bircə tikədir.

Boyumdan boylanan göyə,
Dərdimə həsəd apardım.
Bəxtimə söylənir deyə,
Dartım dilimi qopardım?

Biçilməmiş geyinmişəm,
Əynimə həsrət donunu.
Nə danışıb,nə dinmişəm,
Dərdim içəndə qanımı.

Şirin vaxtı keçdi daha,
Zəhərini dadmaq olmur.
Sevgin mənə səndən baha,
Bu gözü aldatmaq olmur.

Böyüdükcə dərd olmuşam,
Görənlər deyir,bu nədir?
Dərd gələndə bərk durmuşam,
Nə olsun məndən yekədir.