Yüz geyin qızılnan bürünc əyinə,
Yurdun qannan başqa bürüncəyi nə?
Babalar bürünsün bürüncəyinə,
Qalıb yerdə qalan iş gəncə, gəncə.

Bəxtiyar, düzəltməz tək idim heç nə,
Bir az deyinirdim, tək idim heç nə.
Vermədi Qazaxda təkidim heç nə
Bəlkə səndə ola iş Gəncə, gəncə.

***

Yarın sinəsində iki gül açmış,
Ləl gülə qarışib, gül lələ, dünya.
Görməyib böyründən keçib gedəcəm,
Yoluma ləl çıxsa, gül lələ, dünya.

Göyərçin günləri uçurum dedim,
Çıxmaz axırıma uçurum dedim.
Mən ki Ərzuruma uçurum dedim
Mən kimi Kərəmə gül, Lələ dünya

Haq-divan Kar qaya- gəlir öz ünün,
Olmur qazananın, gəlir özünün.
Özünə hayıfı gəlir özünün,
Özü Bəxtiyarı güllələ, dünya.

***

Ömür bağçasında ömür çürütdüm,
Meyvəsin səksənə-səksənə dərdim.
Bəla da gələndə qəfildən gəlir,
Üzülmüş heç demir səksənə dərdim.

Kor tale kor atdı- sürək bu qayda,
Ovçusan aparma sürək bu qayda.
Necə bu ömürü sürək bu qayda
Heç yüzdən enmədi səksənə dərdim.

Dərk etmir dərdləri kəlləm, ay Allah
Qəlbim illər dözər, kəlləm ay, Allah.
Dərd məni aşırdı kəlləmayallaq
Önümdə nazlanıb səksə nə dərdim.

Yarı xoca desin, yarı şagirdi,
Tutmaz hər ustadı yarı, şagirdi.
Zillət Bəxtiyarnan yarışa girdi-
Yolumdan sapınıb səksə nə dərdim

***

Bağrım tikan-tikan, tellərin ilan
İlan qorxub gəlməz kirpiyə sarı.
Həsrət üz-gözümü elə saraldıb
Bir o qalıb düşə kirpiyə sarı.

Oxusa ürəyim xanıma fənndi,
Qul gələ bilərmi xanıma fəndi?
Mən sənə baxanda, xanım əfəndi
Kirpiyim tərpənməz kirpiyə sarı

Dərdmi istəyirsən, apar, var digər
Bu dərd ha üyünsün, a pər, var digər
Sənə qurban olum, a Pərvərdigar,
İlan tamahlari kirpiyə sarı

Demə daş-qaş tale, üzük ömürdü
Ömrün sökük ömür, üzük ömürdü
Yenə bu ölkənin üzü kömürdü
Yüz osun yol boyu hasarı sarı

Məni qışda vurma, qara qan keçər
Ağ qan, qırmızı qan, qara qan keçər
Yenə ürəyimdən qara qan keçər
Bəxtiyar, yaramı ha sarı, sarı.

***

Ağrı ürəkdədi ağrı candadı
Ürək ağrıyarmı ağrı deyəndə
İşimiz bir az da irəli gedir
Qoşqar dediyini Ağrı deyəndə

Uludur yerlərcə, göycə mahalım
Bəllidi Ağrıma, Göyçəmə halım
Qaldı yad əllərdə Göyçə mahalım
Belə ağrıdan de ağrı deyəndə

Bəxtiyar, dirəyə sarıyaq kimi
Gülüb ələ salaq, sarıyaq kimi
Yayılır canıma sarı yağ kimi
Savalan deyəndə, Ağrı deyəndə

***

Ayaqlar biləni başlar bilmirsə
Kamal da buddadı, ad da buddadı
Millətə ad verib ad yedirdirlər
Bu millət tapıbdır adda bu dadı

Harda qaldı sözü bütün adamlar
Qalıb əlində bir bütün adamlar
Bütə səcdə edir bütün adamlr
Yoxsa hamıdan baş adda Buddadı

Neynirəm nadanla dolan aləmi
Dola fəryadımı, dola naləmi
Əlinə çıraq al,dolan aləmi
Bəxtiyar kimisi adda-buddadı.

2. Ən gözəl qanunlar türmə qanunlarıdı
-hayıf ki, çıxa bilmir qırağa
Qazax bir türmədi, şeirlərim türmə qanunları
Nə deyim şeirlərimə, nə deyim Qazaxa.

3. Xoşbəxtsiniz, qarğalar,
- şəhərin ortasında azad şəkildə toplaşıb
- qarillaşa bilirsiniz
Bədbəxtsiniz, qarğalar
300 il bu xarabada yaşamalısınız

4. Yerdən soxulcan çıxarıb,
- onu qarmağa keçirib
- balıq tutan bu uşaq
- bilirsiniz kimi yadıma saldı-
Şəhid oğlunu qəbirdən çıxarıb
- yardım üçün hər idarəyə bir qarmaq atan
O əclafı

5. Molla, sən düz deyirsən
- əncir müqəddəs ağacdı
- yaxşı arağı olur

6. Gecə bir qara toyuq
- hər şey cücəyə dönüb
- yatır qanadı altda

7. Sən çıxma, mən çıxım deyirsən aya,
Sən çıxma, mən çıxım deyirsən günəşə
Noolar, o gələn ölümə de ki,
Bəxtiyarın yoluna sən çıxma, mən çıxım

8. Qoluna qüvvət usta,
- başa çatdırdın bu divarı
- kimi işəyəcək bu divara
- kimi xəlvətdəyib, hissini tökəcək,
- kimi başını döyüb, hirsini tökəcək
- kimini də güllələyəcəklər, bu divarın önündə
- qanını tökəcək bu divara

9. Ey dünya, səviyyəli şou-biznes
- daha doğrusu şortu biznes nümayəndəsi
Mən çoxdan tüpürmüşəm dünyanın səviyyəsinə

10. Hər prezident gələndə,
Hər deputat gələndə, hər bayram gələndə
Qazaxda S.Vurğunun heykəli
- dəyişir öz rəngini (elə sağlığında da belə olub)
Mənimsə əllərimin qabarı dəyişir, tez-tez

11. Qarabağın açarı rusun cibində
- demokratiyanın açarı Amerikanın cibində
Onsuz da açarımızı itirmişik
- bir araq da ver-
Nisyə dəftərinə yaz
-it dəftərində olmayan adımı.

12. Qollarım arxamda qandallı
- mənim də arxamda duran var-
- daha qorxmuram sizdən

13.Xortumunu fil kimi uzadib,
- qanadlarını açıb
- yerdə təqribi bərabərlik işarəsi çəkən
- bu xoruz hinduşka sanki demək istəyir ki-
- heyvanların və quşların mənşəyi
Təqribən eynidi

14. Səndən sonra ürəyim yaralanmadı
- o qədər araq içdim ki, mədəm yaralandı
Amma arağı atmaq heç də
- səni atmaq qədər asan deyilmiş

15. Ey mənim yeniyetmə dövlətim,
- ononizmlə məşğulsan
- xoşbəxtliyin öz əlindədi

16. Şair var lampa kimidi
- asılmasa işıq saçmaz
Şair də var xiyar kimidi
Sarmaşmasa bar verməz

17. Narkoman olan vaxtlarında
- cənnət həzzi adı altında
- varlı balalarını yoldan çıxarırdı bu adam
İndi dindar olub da
- cənnət xülyası ilə
- kasıb balalarını yoldan çıxarır

18. Xalların buğda dənəsi
- əslində elə bədənin də
- çörək ağacıdı

19. Qızlar-yer üzünün ulduzları
Bəlkə də ərəblər ona görə qırılırlar ki,
Bir zaman diri-diri basdırırmışlar qızları

Düşməni üzdən tanımırsınız
Domino daşlarını tərs üzündən tanıyırsınız
Sizi bu günə salanı yox
“naparnik”inizi qınayırsınız

Düşmənin ölüsünə yaxın gedəmmirsınız
Qoşaları diri tutursunuz
Domino oyunu sizinçün hüquqhəyati peşəyə dönüb
Amma bilmirsiniz ki
Neçələri domino oynaya- oynaya
əldə ölən altıqoşaya dönüb

…eviniz yıxılıbdı bilirsinizmi
Uşağın domino daşlarından düzəltdiyi
-evin yıxıldığı kimi

Nə yaxşı tanıdın

Məndə o sevgidən nişanmı qalıb
Baxma yanağına nəm düşə bilər
Bəlkə düşündün ki, belə bir günə
Bəxtiyardan başqa kim düşə bilər
Tutubdu kiminsə qarğışı məni
Nə yaxşı tanıdın nə yaxşı məni

Göz çuxura düşüb ordum batıbdı
Elə bil döyüşdə ordum batıbdı
Üzümü –gözümü saqqal basıbdı
Məni bu görkəmdə tanıyan hanı
Nə yaxşı tanıdın nə yaxşı məni

Sayılan olmadım olmuşam sayıl
Məni adamlar yox fələklər sayır
O gün tanımayıb keçdi Əzrayıl
Hələ də axtarır baxışı məni
Nə yaxşı tanıdın nə yaxşı məni

Yeri, dəniz kimi çağlaya billəm
Yolun ortasında ağlaya billəm
Daha arxayınam baş daşım üçün
İndiki şəklimi saxlaya billəm
Qoy gedim axtarım şəkilçəkəni
Nə yaxşı tanıdın nə yaxşı məni

Burda adamlar qaynaqçılardı
-dərdi Vətənə qaynaq edirlər
Yaxından baxıram göz xarab olur
Ac qarına bağrım kabab olur
Burda yaxşılıq sağ əlindən gələnlər
-hamsı solaxaydılar
Burda tutmağa quyruq var sükan yoxdu
Vətəni uzaqlardan görmək istəyirəm
-uzaqlara getməyə imkan yoxdu
Barı bir binokl verin mənə
əks tərəfindən baxım Vətənə

Əmmamə

Canavar öz ərazisini manşırlayır
Adamlar öz yerini çəpərləyir
Dövlətlər sərhədləri bərkidir,
-olmazı da bölürlər, oları da bölürlər
Səmanı da bölürlər, suları da bölürlər
Anam,sən də mənə deyirsən ki
-darıxma Haqq tapar öz yerini
Haqqa yermi qalıb ki
Anam, haqdan danışma
Və nə də mənə asi demə
Yox-yox mən asi deyiləm-haşa
Dərd məni mömin eləyib
-gəzdiyim başı əmmaməli dostdu
-yəni başı xamırlı şüşə

Niyə gəlməmişdin

…Niyə gəlməmişdin sən o məclisə
Şənliyin içində batmışdım yasa
Mən el basa-basa getmişdim yolu
Qayıtdım çiynimdən dərd basa-basa

Yerin görünürdü baxışlarımda
Hamıdan incidim heç nəyə görə
Umudum asıldı bir sağsağandan
Onu da qovdular cücəyə görə

Qocaltdı həsrətin qocaltdı məni
Ömrüdən neçə il keçdi-bilmərəm
Cavan olməyimdən qorxma sevgilim
Öldü cavanlığım cavan ölmərəm