Şeir olmaq istəyirəm

Şeir olmaq istəyirəm…
Sətir –sətir,
Misra –misra oxunmaqçün.
Şeir olmaq istəyirəm,
Qar kimi ağ vərəqlərə gəlib qonaq,
Təkcə sənin əllərinə toxunmaqçün.
Gözlərindən yaddaşına köçmək üçün,
Qəlbindəki arzuları şirin su tək içmək üçün,
Ürəyinə gedən yolu bir gün gəlib keçmək üçün,
Milyonların arasında təkcə səni seçmək üçün,
İstəyirəm olum şeir.
Gör sevgi həsrətli könlüm ,
Şerə dönüb nələr deyir.
Şeir olmaq istəyirəm,
Xəyalların qanadında səni uzağa aparım.
Bircə anlıq olsa belə kədərin əlindən səni,
Var gücüm ilə qoparım.
Sənə bütün dünyamızın sevincini bəxş eləyim.
Gözlərinə silinməyən təbəssümü nəqş eləyim.
Saçlarına sığal çəkən mehə dönüm,
Yanağınçün həsrət çəkən ,
Göz yaşına, şehə dönüm.
Yağışdan rica eləyim yollarına nur çiləsin.
Yağış göydən gələn nurdur,
Qoy sənə uğur diləsin.
Şeir olmaq istəyirəm,
Dodağından ürəyinə damcı –damcı süzülməkçün,
Göz yaşına yoldaş olub yanağına düzülməkçün,
Dərdini öz dərdim bilib bu dərd ilə üzülməkçün,
Sevincimin hamısısnı sənə verib,
Səninlə bir sevinməkçün istəyirəm olum şeir.
Dönüb bir sevən insanın döyünən, vuran qəlbinə,
Çevrilərək bu şeirlə bir “sevirəm” kəlməsinə,
İstəyirəm olum şeir.
Nəğmələrdə yaşamaqçün,
Sənin adını hər sətrin əvvəlində daşımaqçün,
Dönüb parlaq bir ulduza yoluna nur saçmaq üçün,
Qəlbimi ,gözümün nuru, təkcə sənə açmaq üçün,
Dönüb olacağam şeir.
Nə deyirlər qoy desinlər,
Dönüb olacağam şeir.

Bu gün sahilə getdim,
Özümü də sənlə birgə tapım deyə.
Bəlkə onda heç olmasa
Mən də, mən də hamı kimi
Şirin yuxu yatım deyə.

Sahilə getdim bu gün,
Könlümdə bağlı bir düyün.
Baxdım o mavi gözlü gəlinə.
Dəniz mənə baxdı lal-dinməz,
Mən isə dənizə.

Getdim bu gün sahilə,
Ayrılığı görə-görə,
Yoxluğunu bilə-bilə.
Qorxduğum gəldi başıma.
Nə bu dəli dalğalar,
Nə dəcəl qağayılar,
Nə bu oynaq ləpələr
Məni tanımadı.
Nə qayalar, nə külək, nə də ki doğma sahil
Məni tanımadı.
Elə bilki üzünü yana çevirdi dəniz.
Küləklər göz yaşımı sildi səssiz-səmirsiz.
O günü dənizin də, küləyin də, sahilin də
Gözlərindən oxudum səssiz-səssiz
Yalnız bircə söz-sənsiz.

Xatirələr çalır qapı zəngini

Əllərim sevərdi qapını bir vaxt,
Qapın da duyardı sənə sevgimi.
Mənim əvəzimə indi hər saat,
“Xatirələr çalır indi zəngini”.

Aldanıb qaçırsan qapıya sarı,
Gözlərində məni görmək ümidi.
Ehtiyatlı yeri yolunu barı,
Ümidlərin sınmış şüşə kimidir.

Batar ayağına, batar əlinə,
Yarandan qan deyil, sevgimiz axar.
Qorxuram ki, salıb eşqin selinə,
Bu məhəbbət səni özündə boğar.

Sən öz otağında tənha kimisən,
Sıxar ürəyini bu lal divarlar.
Qorxma o qədər də yalqız deyilsən,
İndi xatirələr zəngini çalar.

Peşmançılıq fayda gətirən deyil,
Ürəyin həsrəti itirən deyil.
Daha gözlədiyin Xatirə deyil,
Xatirələr çalır qapı zəngini.

Yol gəldi həyatdan ölümə qədər,
Torpağın çiynində getdi göz yaşım.
Ağladım yaşımın ilinə qədər,
Sevginin qoynunda itdi göz yaşım.

Hər gecə gözümdən daş yağır, Allah
Basıb yer üzünü daş, qaya, kəsək.
Necə olur olsun, sevən qəlbimi,
Daşa çevrilməyə qoymayam gərək.

İstəmirəm

Daha darıxmıram səninçün, quzum,
Həsrət müəllimdən “beş” istəmirəm.
Dərdim çörəyimdir, göz yaşım duzum,
Səndən ki turşulu aş istəmirəm.

Hər gecə köksümü yarır, oyuram,
Bir az ürəyimdən yeyir, doyuram.
Hələ sabaha da nahar qoyuram,
Amma ayrılıqdan diş istəmirəm.

Başıma həsrəti səpələ gəlsin,
Gözüm elə yağsın, qoy ələ gəlsin.
Dərdimdən məhəbbət əmələ gəlsin,
Çünki ürəyimi boş istəmirəm.

Bəlkə daş deyil

Sulara söykəyib daş sinəsini,
Nə dolu, nə də ki, boş sinəsini.
Günəş də qurutmur yaş sinəsini,
Bu qaya dənizdən sevgi istəyir.

Nə dərdindən şam tək əriyə bilir,
Nə özünü vura, nə döyə bilir.
Nə onun qoynuna yeriyə bilir,
Bu qaya dənizdən sevgi istəyir.

Hər səhər gözündən axan yaş deyil,
Kədərdir, həsrətdir, yalvarış deyil.
Adamdır, insandır, bəlkə daş deyil,
Bu qaya dənizdən sevgi istəyir.