güllər,
çiçəklər,
ağaclar
sənsiz qalacaq.
tanrım hər şeyi əlimdən alacaq.
səndən sonra tənhalıq başlayacaq,
mənə yaxın olacaq
heç nə əvəzedilməz deyil.
sənin də yerini
sənsizlik tutacaq.

Robinzon

28 il tənha adada yaşamış Robinzon Kruzoya
həsr olunur.
eh, Robinzon, Robinzon
həsəd aparıram sənə,
və sənin tənha adadakı
təkliyinə…
yanına gələ bilsəm bir gün
tərcuman ol mənimüçün.
tanıt məni balıqlara,
quşlara
qonşu adadan gələn vəhşilərə
de onlara
«yeni bir qərib gəldi bu yerlərə»
son kərə
vida söylə dənizlərə,
sən insanlığa qucaq aç
mən təkliyə…

Qolsuz əsgər

mən müharibədən şikəst qayıtmış,
gəncliyi sönmüş,
istiqbalı batmış əsgərəm.
«Şah Abbas» camisinin önünə gəlirəm,
hər gün.
hər kəs əllərini allah dərgahına qaldırıb dua edir.
məndə dua edirəm,
camidə.
əlimi qaldırıb dua etmirəm.
əfv et məni allahım!
bəlkədə dua edənlərin hər birindən çoxdu günahım.
əllərini qaldıranlar ümidlidir əfv ola günahı.
mən də
duadan sonra salavat gətirib əlimi üzümə çəkmək istəyirəm.
bunu etməsəm hirsləndirmərəm ki, allahı?
Eh…
bir də mənim əllərim yoxdu axı…

1

axşamın hüznü,
və tənhalığın kədərində anmışam səni
duyasan
duyasan deyə
çarəsizlik deyil ki,
yoxluğun can alıcı
sən ki, baharda uzaqsan gözümdən
dərd eləmişəm özümə
çox düşünmüşəm
düşünmüşəm
və sarılmışam sevdana.

2

sudakı ay işığı
baharda düşən yağmur
bənövşənin üstündəki damla kimi
sevmişəm səni bitanəm
sevmişəm səni

3

günəş çiçəyim,sevdiyim
dönərəm.
hardasan o yana.
itirincə gecə səni
sabah olsun deyə gözləyərəm.
sabah olsun deyə.

4

dünyanin dəyəri gülüşündür
saçında mor bir çiçək,
və səndə çiçəkdən gözəl.
gülüşün sarılmış boynuma,
gülüşün kor bir güllə,
qoyma,
qoyma məni sənsiz.
uzat əllərini bir anlığa.
vurğunam sənə
və sənin gülüşünə.

5

sevdani yaşama bağladım,
canımı canına,
yaşamağı necə sevirəmsə,
sən bilki,
səni də elə sevirəm.

6

suzuz
yorğun
və amansız yoxuşun sonunda,
bir ağaca kürəyini söykəyib
dincəlməyin xoşbəxtliyi kimidir
Xəyallarımın dönüşü.